រាជធានីភ្នំពេញ ៖ រថយន្តឡិចស៊ីស RX៣៣០ មួយគ្រឿងបើកបរដោយបុរសស្រវឹងស្រាម្នាក់បានបើកបត់ឆ្វេងឆ្លងផ្លូវទៅកៀររថយន្តហាយឡែនឌ័រ មួយគ្រឿងដែលបើកបរដោយបុរសស្រវឹងស្រាដូចគ្នា បណ្តាលឱ្យរថយន្តទាំងពីរគ្រឿងកំពិតគូថខាងឆ្វេងដូចគ្នា ។ ហេតុការណ៍នេះកើតឡើងកាលពីវេលាម៉ោង១១ និង១០ នាទីយប់ ថ្ងៃទី ២២ កក្កដា ២០១៤ នៅចំណុចមុខហាងខារ៉ាអូរខេ នគរសំរិទ្ធ តាមផ្លូវ១៨២ ស្ថិតក្នុងសង្កាត់ទឹកល្អក់ ៣ ខណ្ឌទួលគោក ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តឡិចស៊ីសRX-៣៣០ មួយគ្រឿង ពណ៌ស្ករ ពាក់ស្លាកលេខភ្នំពេញ 2T-6116 បើកបរដោយបុរសស្រវឹងស្រាម្នាក់យ៉ាងលឿន តាមផ្លូវ១៨២ ក្នុងទិសដៅ ពីកើតទៅលិច មកដល់ចំណុចកើតហេតុក៏បានបត់ឆ្វេងឆ្លងផ្លូវ ក៍ជ្រុលទៅបុករថយន្តហាយឡែនឌ័រ ពណ៌សមួយគ្រឿង ពាក់ស្លាកលេខភ្នំពេញ 2W-1721 បើកបរដោយបុរសម្នាក់ស្រវឹងស្រាដូចគ្នា តាមផ្លូវ១៨២ ក្នុងទិសដៅពីលិច មកកើត (បញ្រ្ចាសទិសគ្នា) បណ្តាលឱ្យរថយន្តទាំងពីរគ្រឿង កំពិតគូថដូចគ្នា ។
បន្ទាប់ពីបើកកៀរគ្នាហើយភាគីទាំងពីរមិនព្រមធ្វើការសម្រួលគ្នាឱ្យបានលឿននោះទេដោយចតរថយន្តចោលនៅលើផ្លូវអស់ជាងមួយម៉ោង ទើបដឹងដល់សមត្ថកិច្ចចុះទៅសម្របសម្រួល ដោយភាគីខាងរថយន្តឡិចស៊ីស សុំសងថ្លៃខូចខាត តែភាគីខាងរថយន្តហាយឡែនឌ័រមិនយកទេ ដោយគ្រាន់តែឱ្យភាគីរថយន្តឡិចស៊ីស យករថយន្តរបស់គាត់ទៅជួសជុល។
ចែករំលែកព័តមាននេះ