រាជធានីភ្នំពេញ ៖ រថយន្តកូរ៉ូឡា មួយគ្រឿង ជិះដោយបុរសនារី ២នាក់បានបើកឡើងសួនជ្រុលទៅបុកដើមឈើមួយដើម បណ្តាលឱ្យរថយន្តបែកពោងការពារពីរ ប្រេះកញ្ចក់ និងបែកខឿនសួនពីរកង់ សំណាងល្អអ្នកបើកបរពុំមានរងរបូស និងបានបើកទ្វាររថយន្តរត់គេចខ្លួនបាត់ស្រមោល ។ ហេតុការណ៍នេះកើតឡើងកាលពីវេលាម៉ោង១០ និង ៣០នាទីយប់ ថ្ងៃទី ២២ កក្កដា ២០១៤ នៅតាមបណ្តោយផ្លូវសហព័ន្ធសុស្ស៊ី ស្ថិតនៅក្នុងសង្កាត់មិត្តភាព ខណ្ឌ៧មករា ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញរថយន្តកូរ៉ូឡា មួយគ្រឿង ពណ៌ស្ករ ពាក់ស្លាកលេខភ្នំពេញ 2S-7981 បើកបរដោយបុរសម្នាក់ និងរួមដំណើរដោយនារីម្នាក់ បានធ្វើដំណើរយ៉ាងលឿនតាមផ្លូវ សហព័ន្ធរុស្ស៊ី ក្នុងទិសដៅពីលិច ទៅ កើត មកដល់ចំណុចកើតហេតុ មានផ្លូវបែកជាពីរ មិនដឹងជាយ៉ាងម៉េចរថយន្តខាងលើមិនបានបើកទៅខាងផ្លូវណាមួយទេ ស្រាប់តែរថយន្តខាងលើបើកឡើងសួន និងជ្រុលទៅបុកដើមឈើមួយដើមពេញទំហឹងទៅវិញ បណ្តាលឱ្យរថយន្តបែកពោងការពារពីរ ប្រេះកញ្ចក់ និងបែកខឿនសួនពីរកង់ សំណាងល្អអ្នកបើកបរពុំមានរងរបូស និងបានបើកទ្វាររថយន្តរត់គេចខ្លួនបាត់ស្រមោល។
ក្រោយពេលកើតហេតុសមត្ថកិច្ចបានស្ទូចយករថយន្តបង្កខាងលើទៅទុកនៅការិយាល័យ ចរាចរនៃអធិការដ្ឋាននគរបាលរាជធានីភ្នំពេញ ដើម្បីរងចាំម្ចាស់ចូលខ្លួនមកដោះស្រាយតាមផ្លូវច្បាប់ ។
ចែករំលែកព័តមាននេះ