ក្រុងប៉ោយប៉ែត ៖ ស្ត្រីក្មេងចាស់៣នាក់បានរងរបួសដោយសារការវាយប្រហារដោយទឹកអាស៊ីតនៅតូបលក់គុយទាវ យីហោអុីញ៉ាញ់ ក្នុងផ្សារអគ្គៈថ្មី ស្ថិតក្នុងភូមិបាលិលេយ្យ១ សង្កាត់ប៉ោយប៉ែត កាលពីវេលាម៉ោងជាង៣រសៀលថ្ងៃទី២១ កក្កដា ដែលហេតុការណ៍នេះ គេដាក់ការសង្ស័យទៅលើករណីស្នេហាត្រីកោណ ។
តាមសាក្សីនៅកន្លែងកើតហេតុ ដែលជាម្ចាស់តូបឈ្មោះ ហ៊ុល ស្រីអន ភេទស្រី អាយុ៤៤ឆ្នាំ និយាយថា មុនហេតុការណ៍កើតឡើងមានស្ត្រីម្នាក់ពាក់ម៉ាស់ និងពាក់មួកជិតមកឈរខាងលិចតូបរបស់គាត់ ។ បន្ទាប់មកក៏មានសកម្មភាពជះទឹកអាស៊ីតប្រាវតែម្តង ធ្វើឱ្យជនរងគ្រោះទី១ ដែលជាស្ត្រីភេទ ហុយផ្សែងទ្រលោមនៅលើក្បាល ។ ក្នុងនោះស្ត្រីម្នាក់ផ្សេងទៀតដែលមានកូនស្រីវ័យប្រហែល៥ឆ្នាំ កំពុងអង្គុយហូបគុយទាវនៅក្បែរនោះ ក៏រងរបួសរលាករាងកាយដែរ ។
នៅកន្លែងកើតហេតុមានបន្សល់ទុកទឹកអាស៊ីតចំនួន២ដបស្រាបៀរដបធំ ផ្តិល១ និងកាបូប១ ហើយស្ត្រីដៃដល់ជាម្ចាស់ទឹកអាស៊ីតបានរត់កាត់ផ្សារទៅទិសខាងជើងបាត់ស្រមោល។ ចំណែកស្ត្រីរងគ្រោះបានឡើងម៉ូតូឌុបទៅគ្លីនិកឯកជនមួយ បន្ទាប់មកត្រូវប្តីដឹកតាមរថយន្តផ្ទាល់ខ្លួនទៅមន្ទីរពេទ្យមិត្តភាពកម្ពុជា-ជបុ៉ន មង្គលបុរី ដើម្បីព្យាបាល ។ រីឯស្ត្រី២នាក់ម្តាយ និងកូនដែលរងគ្រោះក្នុងហេតុការណ៍នោះមិនដឹងថា ទៅព្យាបាលនៅទីណាទេ។
បើតាមបុរសអ្នករត់ម៉ូតូឌុបដែលឌុបស្ត្រីរងគ្រោះក្រោយការវាយប្រហារដោយទឹកអាស៊ីត បានប្រាប់ថា តាមស្ត្រីរងគ្រោះបានប្រាប់គាត់ថា ស្ត្រីដៃដល់នោះជាប្រពន្ធចុងរបស់ប្តីគាត់ ។ ពិតជាគួរឱ្យភ្ញាក់ផ្អើល ដែលគេធ្លាប់តែឮថា ប្រពន្ធដើមវាយប្រហារលើប្រពន្ធចុង ឬជាស្ត្រីកំណាន់របស់ប្តី តែករណីនេះ បែរជាប្រពន្ធចុងវាយប្រហារលើប្រពន្ធដើមទៅវិញ ពិតជាខ្លាំងរបស់គេមែន ។ នៅចំពោះមុខនគរបាលដែលបានទៅសួរនាំបុរសជាប្តីឈ្មោះ ង៉ែត វុទ្ធី អាយុ៥១ឆ្នាំ មានទីលំនៅនៅរាជធានីភ្នំពេញ ដែលកំពុងនៅកំដរប្រពន្ធនៅមន្ទីរពេទ្យបង្អែកមិត្តភាពកម្ពុជា-ជបុ៉ន ស្រុកមង្គលបុរី បានបំភ្លឺប្រាប់សមត្ថកិច្ចថា គាត់ជាអ្នកមើលការខុសត្រូវឱ្យរោងចក្របារី ជាបុរសពោះម៉ាយ បានរៀបការជាមួយស្ត្រីឈ្មោះ តាំង មួយជួ អាយុ៣០ឆ្នាំ ដែលជាស្ត្រីមេម៉ាយកូន១ មានទីលំនៅភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ។
គាត់ និងស្ត្រីរងគ្រោះបានគ្នាជាប្តីប្រពន្ធរយៈពេលជិត៤ខែមកហើយ គឺរៀបការនៅខែមីនា ឆ្នាំ២០១៤ ។ អ្នកដែលជះទឹកអាស៊ីតទៅលើស្ត្រីជាប្រពន្ធគាត់នោះឈ្មោះ ពៅ សុខា អាយុ២៦ឆ្នាំ អតីតជាកម្មកររោងចក្រផ្នែកចុងភៅ ។ បច្ចុប្បន្នស្ត្រីរូបនេះបានឈប់ធ្វើការរយៈពេលជាង៦ខែហើយ ។
បុរសដែលអះអាងថា ជាប្តីរៀបរាប់ថា កាលពីមុន នាងពៅ សុខា មិនទាន់ឈប់ធ្វើការ គឺជាមួយគ្រួសាររបស់លោកមានទំនាក់ទំនងគ្នាល្អណាស់ ។ ចំពោះការឈប់ធ្វើការនោះ ដោយសារឈ្មោះសុខា ចាយលុយថ្លៃម្ហូបលើសកំណត់ ដែលក្នុង១ថ្ងៃគេឱ្យចាយថ្លៃម្ហូបកំណត់ត្រឹមតែ១០ម៉ឺនរៀលបុ៉ណ្ណោះ បុ៉ន្តែចុងភៅនេះចាយ៣ថ្ងៃអស់លុយ២លានរៀល ដែលលោកឱ្យចំនួន២លានរៀលនោះសម្រាប់ការទិញម្ហូប២០ថ្ងៃ ។
ពេលនោះបានសុំលុយថ្លៃម្ហូបទៀត លោកក៏សួរនាំ បុ៉ន្តែនាងនិយាយថា ទិញអីវ៉ាន់ប្រើប្រាស់អស់ហើយ ហើយលោកនិយាយថា បើទិញអីវ៉ាន់ប្រើប្រាស់ ក៏មិនអស់លុយដែរ រួចលោកឱ្យស្ត្រីនោះរកលុយមកសងក្រុមហ៊ុនវិញ ។ បន្ទាប់មកក៏ឱ្យលុយនាងចំនួន២លានរៀលទៀតសម្រាប់ថ្លៃម្ហូបរយៈពេល២០ថ្ងៃ បុ៉ន្តែក្រោយពីប្រគល់ឱ្យហើយ នាងមកធ្វើការតែ៣ទៅ៤ថ្ងៃក៏ឈប់មករហូត គឺគេចខ្លួនបាត់ ។ តាមបុរសជាប្តីនិយាយបន្តថា មានថ្ងៃមួយក្នុងអំឡុងខែមិថុនាកន្លងទៅ ខណៈពេលលោកនាំប្រពន្ធទៅចូលរួមក្នុងពិធីបុណ្យគេ ស្រាប់តែកម្មកររបស់លោកបានទូរស័ព្ទប្រាប់ថា ស្ត្រីឈ្មោះពៅ សុខា បានចូលទៅបន្ទប់លោកធ្វើការ ។
ពេលនោះលោកបានមកជួបស្ត្រីរូបនោះ ដោយសាកសួរពីការចូលបន្ទប់ធ្វើការរបស់លោក រួចហើយក៏នាំប្រពន្ធជិះរថយន្តទៅចូលរួមបុណ្យគេបាត់ទៅ ។ ចាប់ពីពេលនោះមក ស្ត្រីឈ្មោះសុខា មិនដែលមកទាក់ទងជាមួយក្រុមគ្រួសារលោកទៀតឡើយ ។ លុះនៅវេលាម៉ោង៣រសៀលថ្ងៃទី២១ កក្កដា ស្រាប់តែគេទូរស័ព្ទប្រាប់ថា ប្រពន្ធរបស់លោកត្រូវស្ត្រីម្នាក់ជះទឹកអាស៊ីតដាក់បណ្តាលឱ្យរងរបួសធ្ងន់ផ្នែកខាងឆ្វេងដងខ្លួន និងក្បាល ។ បុរសឈ្មោះ ង៉ែត វុទ្ធី បញ្ជាក់ថា ចំពោះរឿងស្នេហានោះ រូបលោកមិនបានជាប់ពាក់ព័ន្ធជាមួយនឹងស្ត្រីជាជនដៃដល់នោះទេ បុ៉ន្តែចំពោះចិត្តស្ត្រីដែលជាជនដៃដល់ឈ្មោះសុខា មានចិត្តមកលើរូបលោកនោះ ក៏មិនដឹងដែរ ។ ម្យ៉ាងវិញទៀត លោកតែងនិយាយថា ធ្វើការគិតតែធ្វើការ កុំគិតអ្វីលើសពីនេះ ប៉ុន្តែរឿងឈ្មោះសុខា បានប្រព្រឹត្តអំពើដ៏លាមកទៅលើប្រពន្ធរបស់លោក មិនដឹងជារឿងអ្វីនោះទេ ។
បើរូបលោកនិងឈ្មោះសុខា នោះមិនដែលឈ្លោះទាស់ពាក្យសម្តីនឹងគ្នាផងនោះ គឺមានតែរឿងលោកឱ្យស្ត្រីរូបនោះយកលុយមកសងក្រុមហ៊ុនបុ៉ណ្ណោះ ចំពោះលុយដែលនាងចាយលើសកំណត់ ។ ឈ្មោះសុខា នេះមកធ្វើការជាចុងភៅដាំស្លក្នុងរោងចក្ររបស់លោកនេះ បានរយៈពេលជាង១ឆ្នាំផងដែរ ។ តាមសម្តីស្ត្រីរងគ្រោះជាប្រពន្ធបានប្រាប់សមត្ថកិច្ចថា មុនពេលកើតហេតុ គាត់បានជិះម៉ូតូឌុបទៅផ្សារអគ្គៈ (ផ្សារប៉ោយប៉ែត) ដើម្បីយកលុយទៅសងថ្លៃទិញផ្លែឈើគេ ។ ពេលនោះគាត់បានឃើញស្ត្រីឈ្មោះសុខា ជិះម៉ូតូឌុបដែរ (ទិសដៅផ្ទុយគ្នា) ដោយពាក់ម៉ាស់មុខ ពាក់មួក និងមានកាន់ផ្តិល បុ៉ន្តែគាត់មិនបានចាប់អារម្មណ៍ថា ឈ្មោះសុខា នោះមានបំណងអាក្រក់មកលើគាត់ទេ ។ ពេលទៅដល់ផ្សារ គាត់ក៏អង្គុយហូបបាញ់ស៊ុងមិនទាន់យកលុយទៅសងគេផង ស្រាប់តែមានស្ត្រីម្នាក់ជះទឹកអាស៊ីតមកលើគាត់ ហើយរត់គេចខ្លួន ។
ពេលដែលរត់នោះគាត់ដឹងថា ស្ត្រីនោះឈ្មោះសុខា ព្រោះបានស្គាល់សម្លៀកបំពាក់ដែលគាត់ឃើញពេលជិះម៉ូតូជួបគ្នា ។ ទាក់ទិននឹងករណីហិង្សាដោយចេតនានេះ មតិប្រជាពលរដ្ឋដែលឃើញហេតុការណ៍និយាយតៗគ្នាថា នេះគឺជារឿងស្នេហាត្រីកោណ បើទោះបីជាបុរសឈ្មោះ ង៉ែត វុទ្ធី ជាប្តីមិនបានបង្ហើបប្រាប់ដល់សមត្ថកិច្ចក៏ដោយ បើមិនដូច្នោះមិនមែនមានរឿងដល់វាយប្រហារដោយទឹកអាស៊ីតដូច្នេះឡើយ ។ នៅកន្លែងកើតហេតុ នគរបាលបុ៉ស្តិ៍សង្កាត់ប៉ោយប៉ែតបានរកឃើញទឹកអាស៊ីតច្រកក្នុងដបស្រាបៀរចំនួន២ដបទៀត និងផ្តិលជ័រមួយដែលបានប្រើសម្រាប់ជះទឹកអាស៊ីត ។ ករណីនេះ សមត្ថកិច្ចនគរបាលក្រុងប៉ោយប៉ែតនិយាយថា នឹងខិតខំស្វែងរកជនដៃដល់ដែលវាយប្រហារដោយទឹកអាស៊ីតនោះដើម្បីសួរនាំថា តើជាករណីអ្វី គំនុំឬក៏ជាបញ្ហាស្នេហាត្រីកោណ ដើម្បីផ្តន្ទាទោសតាមច្បាប់ ។
គួរកត់សម្គាល់ថា ការវាយប្រហារដោយទឹកអាស៊ីតបានស្ងប់ស្ងាត់ច្រើនឆ្នាំមកហើយ គឺតាំងតែពីរាជរដ្ឋាភិបាល កាលពីឆ្នាំ២០១១ បានធ្វើច្បាប់ដាក់ទោសជាទម្ងន់ដល់អ្នកដែលបានប្រព្រឹត្ត ។ មិនតែបុ៉ណ្ណោះ រាជរដ្ឋាភិបាលក៏បានដាក់បញ្ញត្តិដោយរឹតបន្តឹងនៅតាមទីផ្សារលក់ និងការនាំចូលទឹកអាស៊ីតផងដែរ ។ អ្នកច្បាប់និយាយថា អ្នកដែលវាយប្រហារដោយទឹកអាស៊ីតជាជនឧក្រិដ្ឋ ព្រោះអ្នករងគ្រោះអាចពិការមួយជីវិត ៕
ចែករំលែកព័តមាននេះ