រាជធានីភ្នំពេញ ៖ ការព្យាយាមដាក់ញត្តិរបស់ព្រះសង្ឃ អង្គការសង្គមស៊ីវិល សមាគមខ្មែរកម្ពុជាក្រោម សហព័ន្ធនិស្សិតបញ្ញវន្តកម្ពុជា និងក្រុមប្រជាពលរដ្ឋជាច្រើនរយនាក់ នៅថ្ងៃទី២២ កក្កដា គឺជាថ្ងៃទី២ នៃការតវ៉ានៅមុខស្ថានទូតវៀតណាមប្រចាំប្រទេសកម្ពុជា ។ ការតវ៉ានោះ គឺមានបំណងទាមទារឱ្យមានការសុំទោសជាសាធារណៈពីសំណាក់អ្នកនាំពាក្យស្ថានទូតវៀតណាម លោកត្រឹង វ៉ាន់ថុង ដែលបាននិយាយថា ទឹកដីកម្ពុជាក្រោមជារបស់វៀតណាមជាយូរយារណាស់មកហើយ មិនមែនជាដែនដីដែលបារាំងកាត់ឱ្យនោះទេ ។
បុ៉ន្តែការតវ៉ានេះត្រូវបានបញ្ចប់ដោយមានអ្នកតំណាងម្នាក់ គឺលោកថាច់ សេដ្ឋា ប្រធានសមាគមខ្មែរកម្ពុជាក្រោម បានប្រគល់ញត្តិជូនដល់លោកឡុង ឌីម៉ង់ ជាតំណាងមកពីសាលារាជធានីភ្នំពេញ ដើម្បីយកទៅដាក់នៅក្រសួងការបរទេសឱ្យធ្វើការដោះស្រាយជាបន្តទៀត ចំណែកស្ថានទូតវៀតណាម មិនមានមន្ត្រីណាម្នាក់ចេញមកទទួលយកញត្តិនោះឡើយ ។ ការមកជួបជុំគ្នាដើម្បីដាក់ញត្តិនៅស្ថានទូតវៀតណាមក្នុងថ្ងៃទី២ គឺថ្ងៃទី២២ កក្កដា បានប្រព្រឹត្តទៅចាប់ពីម៉ោង៩ព្រឹករហូតដល់ម៉ោង១២និង៣០នាទីថ្ងៃត្រង់ទើបបញ្ចប់ និងប្រកាសរំសាយចេញពីមុខស្ថានទូតវៀតណាមប្រចាំនៅព្រះរាជាណាចក្រកម្ពុជា ដែលមានទីតាំងស្ថិតនៅតាមមហាវិថីព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន ។
ស្របពេលដែលក្រុមអ្នកតវ៉ាដាក់ញត្តិ កំពុងនាំគ្នាទាមទារសាជាថ្មីទៀតនៅមុខស្ថានទូតវៀតណាម ដើម្បីដាក់គំនាបឱ្យអ្នកនាំពាក្យស្ថានទូតវៀតណាម ចេញមុខសុំទោសជាសាធារណៈនោះ អាជ្ញាធររាជធានីភ្នំពេញ បានកោះហៅសហព័ន្ធនិស្សិតបញ្ញវន្តកម្ពុជា និងសមាគមខ្មែរកម្ពុជាក្រោមដើម្បីប្រជុំពិភាក្សា ជាពិសេសបញ្ចៀសការតវ៉ាបិទផ្លូវ និងរកវិធីធ្វើយ៉ាងណាផ្តល់ញត្តិនោះឱ្យបានដល់ស្ថានទូតវៀតណាម ។ កិច្ចប្រជុំនេះបានធ្វើនៅសាលារាជធានីភ្នំពេញ នាព្រឹកថ្ងៃទី២២ កក្កដា ក្រោមអធិបតីភាពលោក ឃួង ស្រេង អភិបាលរងរាជធានីភ្នំពេញ ។ ក្រុមអ្នកតវ៉ា តំណាងដោយលោក ថាច់ សេដ្ឋា ប្រធានសមាគមខ្មែរកម្ពុជាក្រោម និងតំណាងសហព័ន្ធនិស្សិតបញ្ញវន្តកម្ពុជា និងមន្ត្រីក្រោមឱវាទសាលារាជធានីភ្នំពេញជាច្រើនរូបទៀត ។
លោកឃួង ស្រេង បានលើកឡើងថា ការកោះហៅសហព័ន្ធនិស្សិតបញ្ញវន្តកម្ពុជា និងសមាគមខ្មែរកម្ពុជាក្រោមមកប្រជុំពិភាក្សានេះ គឺក្នុងគោលបំណងបញ្ចៀសការបិទផ្លូវដោយហេតុថា បងប្អូនបានដង្ហែក្បួនកាលពីថ្ងៃទី២១ កក្កដា ដើម្បីយកញត្តិទៅដាក់តាមស្ថានទូត បានសម្រេចជោគជ័យហើយ ។ ទោះបីស្ថានទូតវៀតណាមមិនទទួលយកញត្តិពីបងប្អូនក៏ពិតមែន ប៉ុន្តែអ្វីដែលជាបំណងរបស់សមាគមទាំងពីរបានធ្វើនោះ ត្រូវបានផ្សព្វផ្សាយដឹងឮដល់មតិជាតិ និងអន្តរជាតិបានដឹងអស់ទៅហើយ មិនគួរបងប្អូនបន្តធ្វើដោយបិទផ្លូវមុខស្ថានទូតវៀតណាមជាថ្មីម្តងទៀតនោះទេ ។ ម្យ៉ាងទៀត ការធ្វើបែបនេះ ក៏ហាក់ដូចជាបងប្អូនចាប់ប្រជាពលរដ្ឋរស់នៅក្នុងរាជធានីភ្នំពេញធ្វើជាចំណាប់ខ្មាំងដែរ ។
ជាលទ្ធផល បន្ទាប់ពីប្រជុំពិភាក្សា និងការសម្របសម្រួលពីអាជ្ញាធររាជធានីភ្នំពេញអស់រយៈពេលប្រមាណ២ម៉ោងរួចមក តំណាងក្រុមអ្នកតវ៉ាបានឯកភាព និងឱ្យមន្ត្រីសាលារាជធានីភ្នំពេញ ជាអ្នកចេញមុខទៅទទួលយកញត្ដិនៅមុខស្ថានទូតវៀតណាម និងបញ្ជូនញត្ដិនោះបន្តទៅក្រសួងការបរទេសកម្ពុជា ដើម្បីសម្របសម្រួលបន្ដ ។ ប៉ុន្ដែទោះជាយ៉ាងណា តំណាងសមាគមខ្មែរកម្ពុជាក្រោម និងសហព័ន្ធនិស្សិតបញ្ញវន្ដកម្ពុជានិយាយថា សមាគមរបស់លោកនឹងទុកពេលឱ្យ២សប្ដាហ៍ បើមិនមានការឆ្លើយតបទេ ក្រុមរបស់លោកនឹងតវ៉ាបន្ដទៀត ក្នុងបំណងឱ្យវៀតណាមទទួលស្គាល់សច្ចភាពប្រវត្ដិសាស្រ្ដទឹកដីកម្ពុជាក្រោម ដែលជាអតីតទឹកដីរបស់ខ្មែរ ។
ទាក់ទិននឹងការកំណត់ពេលនេះ លោកឃួង ស្រេង បានបញ្ជាក់ថា អាជ្ញាធររាជធានីមិនអាចកំណត់ពេលបានទេ គឺអាស្រ័យទៅលើក្រសួងការបរទេស ព្រោះសាលារាជធានីមិនអាចលូកដៃទៅក្នុងស្ថាប័នថ្នាក់ជាតិបានទេ គឺគ្រាន់តែជាអ្នកសម្របសម្រួល និងបញ្ជូនញត្ដិនេះទៅក្រសួងតែប៉ុណ្ណោះ ហើយក៏មិនមានន័យថា អាជ្ញាធរចូលរួមដាក់ញត្ដិនោះដែរ ។ ការប្រមូលគ្នាដាក់ញត្តិដើម្បីសុំឱ្យមានការចេញមកសុំទោសជាសាធារណៈរបស់អ្នកនាំពាក្យស្ថានទូតវៀតណាមប្រចាំប្រទេសកម្ពុជា នាព្រឹកថ្ងៃទី២២ កក្កដា នោះផងដែរ បានទម្លាក់ការទាមទារថា ប្រសិនបើមិនមានការសុំទោសជាសាធារណៈដោយផ្ទាល់មាត់ទេ គឺសុំឱ្យមានការសុំទោសជាលាយលក្ខណ៍អក្សរក៏បានដែរ ។ ក្នុងពេលនោះដែរ ខាងព្រះសង្ឃដែលនិមន្តមកពីកម្ពុជាក្រោម ក៏បានប្រកាសដែរថា សុំឱ្យប្រទេសវៀតណាមធ្វើការដោះលែងព្រះសង្ឃខ្មែរកម្ពុជាក្រោមចំនួន២អង្គ ព្រះនាម លីវ នី ជាព្រះចៅអធិការ និងព្រះនាម ថាច់ ធឿន ជាគ្រូសូត្រនៅវត្តសិរីតាសេក ស្រុកជ្រោយញរ ខេត្តឃ្លាំង ដែលបានចាប់ផ្សឹក ហើយយកទៅដាក់ពន្ធនាគារកាលពីថ្ងៃទី១៦ កក្កដា ២០១៣ កន្លងមក ។
ក្នុងពិធីប្រគល់ញត្តិរបស់លោកថាច់ សេដ្ឋា ជាតំណាងឱ្យក្រុមអ្នកតវ៉ាទាំងអស់ដែលបានមកចូលរួមនោះ ក្រោយពីធ្វើការប្រគល់ហើយ លោកមានប្រសាសន៍ថា បន្ទាប់ពីមានការចរចា និងដោះស្រាយគ្នានៅសាលារាជធានីភ្នំពេញរួចមក ទើបលោកព្រមប្រគល់ញត្តិនេះទៅឱ្យលោកឡុង ឌីម៉ង់ ជាតំណាងសាលារាជធានីភ្នំពេញ ដើម្បីយកទៅដោះស្រាយជូនដល់បងប្អូនទាំងអស់គ្នា ។ ជាមួយនេះ ក៏សូមឱ្យបងប្អូនដែលបានមកចូលរួមក្នុងពេលនេះរំសាយ ដោយទុកជូនទៅរាជរដ្ឋាភិបាលដោះស្រាយជាមួយនឹងរដ្ឋាភិបាលវៀតណាមវិញ និងដកឃ្លាដើម្បីរង់ចាំតាមដានជាបន្តទៀតក្នុងរយៈពេល២អាទិត្យខាងមុខ។
លោកឡុង ឌីម៉ង់ អ្នកនាំពាក្យសាលារាជធានីភ្នំពេញ និងជាអ្នកតំណាងដែលមកទទួលញត្តិនៅខាងមុខស្ថានទូតវៀតណាមប្រចាំប្រទេសកម្ពុជា នៅព្រឹកនោះនិយាយថា លោកនឹងនាំយកញត្តិដែលបងប្អូនយកមកដាក់ជូនទៅស្ថានទូតវៀតណាមនាពេលនេះបន្តទៅក្រសួងការបរទេសដើម្បីដោះស្រាយជាមួយនឹងស្ថានទូតជាបន្តទៀត ។ ក្នុងពិធីប្រគល់ញត្តិនោះ គឺមានការស្រែកតវ៉ាប្រឆាំងពីសំណាក់ព្រះសង្ឃ ប្រជាពលរដ្ឋ និងក្រុមនិស្សិតផងដែរ ក្នុងការប្រគល់ជូនដល់អ្នកតំណាងជាជនជាតិខ្មែរ គឺពួកគាត់ចង់ឱ្យមានអ្នកតំណាងជាជនជាតិវៀតណាម ដែលជាបុគ្គលិកនៃស្ថានទូតវិញ ទើបពួកគាត់ស្ងប់ចិត្ត ។ ការប្រគល់ និងទទួលញត្តិក្នុងពេលនោះ ក៏បានប្រព្រឹត្តទៅយ៉ាងតក់ក្រហល់ និងមានការតវ៉ាខាងពាក្យសម្តីគួរឱ្យកត់សម្គាល់ រួចហើយក៏នាំគ្នារំសាយ ។
ទិដ្ឋភាពអួអាប់ក្នុងការដាក់ញត្តិតវ៉ានៅខាងមុខស្ថានទូតវៀតណាម ដែលធ្វើឱ្យមហាវិថីព្រះមុនីវង្សកកស្ទះចរាចរណ៍មិនអាចឆ្លងកាត់បាន ក៏ត្រូវបើកឱ្យធ្វើចរាចរណ៍ឡើងវិញនៅម៉ោង១រសៀលថ្ងៃដដែល ។ ប្រការគួរឱ្យកត់សម្គាល់ផងដែរនោះ គឺការផ្តល់ទឹកបរិសុទ្ធ និងបាយកញ្ចប់ ពិសេសការប្រគេនដល់ព្រះសង្ឃជាចង្ហាន់បាយកញ្ចប់ និងទឹកបរិសុទ្ធដែលបង្ហាញពីឆន្ទៈខ្មែរពិតប្រាកដនាពេលនេះ ៕
ចែករំលែកព័តមាននេះ