ខេត្ដបាត់ដំបង ៖ អគ្គិភ័យដែលគេសង្ស័យថាបណ្ដាលមកពីឆ្លងចរន្ដអគ្គិសនី បានឆាបឆេះផ្សារស្រុកភ្នំព្រឹកអស់គ្មានសល់ កាលពីពាក់កណ្ដាលអធ្រាត្រយប់ថ្ងៃទី២១ កក្កដា ដែលគេអះអាងថា ទំនិញនិងទ្រព្យសម្បត្តិស្ទើរទាំងស្រុងបានក្លាយជាផេះ បើគិតជាទឹកប្រាក់យ៉ាងតិចជិត២លានដុល្លារ ។
អាជ្ញាធរស្រុកភ្នំព្រឹកបានឱ្យដឹងថា តូបលក់ដូរចំនួន២៤៤នៅក្នុងផ្សារត្រូវអគ្គិភ័យលេបត្របាក់ទាំងស្រុងជាមួយនឹងទំនិញសព្វបែបយ៉ាងរបស់អាជីវករដែលទុកដាក់ក្នុងតូប ។
គ្មានមនុស្សស្នាក់នៅក្នុងផ្សារទេ ហើយអគ្គិភ័យបានចាប់ផ្ដើមកើតឡើង គ្រាដែលអ្នកផ្សារកំពុងលង់លក់ក្នុងដំណេកស្ងាត់អស់ទៅហើយ ។ គេសង្ស័យថា អគ្គិភ័យនោះកើតឡើងដោយសារឆ្លងចរន្តអគ្គិសនីនៅក្នុងផ្សារតែម្ដង ព្រោះខ្សែភ្លើងដែលតបំបែកជាខ្នែងប្រើក្នុងផ្សារនេះមានភាពរញ៉េរញ៉ៃដែលមានហានិភ័យខ្ពស់បំផុត ។ សមត្ថកិច្ចស្រុកភ្នំព្រឹកបាននិយាយដែរថា ក្រុមអាជីវករដែលរស់នៅក្បែរផ្សារនោះបានសម្រុកចូលទៅក្នុងផ្សារយកទ្រព្យសម្បត្តិរបស់ខ្លួនបានតិចតួច ដោយសារតែអគ្គិភ័យមានកម្លាំងខ្លាំង ។
ដោយឡែក រថយន្តពន្លត់អគ្គិភ័យមានតែប៉ុន្មានគ្រឿងតូចៗប៉ុណ្ណោះ ដែលជួយអន្តរាគមន៍ពីខាងអាជ្ញាធរថៃ ខណៈរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តបានចេញអន្តរាគមន៍ក្នុងចម្ងាយផ្លូវជិត១០០គីឡូម៉ែត្រពីទីរួមខេត្តទៅកាន់តំបន់ព្រំដែន ជាហេតុមិនអាចជួយសង្គ្រោះអ្វីបានទាន់ពេលទេ ។ លោក រៀម សារ៉េត នាយរងការិយាល័យបង្ការពន្លត់អគ្គិភ័យនៃស្នងការដ្ឋាននគរបាលខេត្ត មានប្រសាសន៍ថា រថយន្តពន្លត់អគ្គិភ័យខាងភាគីថៃបានឆ្លងចូលមកជួយអន្តរាគមន៍ មុនពេលក្រុមពន្លត់អគ្គិភ័យរបស់លោកទៅដល់ ។ ប៉ុន្តែ រថយន្តពន្លត់អគ្គិភ័យរបស់ថៃតូចៗមិនអាចធ្វើឱ្យឥទ្ធិពលភ្លើងថមថយបានទេ ព្រោះវាបានឆេះពេញបន្ទុកលើសពីការគ្រប់គ្រងទៅហើយ ខណៈក្រុមរថយន្តពន្លត់អគ្គិភ័យរបស់លោកចំនួន៣គ្រឿងបានរត់ពេញល្បឿនលើចម្ងាយផ្លូវជិត១០០គីឡូម៉ែត្រ ។ លោកបន្ដថា ពេលក្រុមរបស់លោកចុះទៅគឺភ្លើងកំពុងមានកម្លាំងខ្លាំង និងបានលេបត្របាក់តូបក្នុងផ្សារអស់ស្ទើរ៧០%ទៅហើយ ដូច្នេះហើយទើបយើងមិនអាចជួយសង្គ្រោះអ្វីបាន ។
អាជីវករម្នាក់គឺលោក ជា សុខ បានប្រាប់តាមទូរស័ព្ទថា ម្ដាយរបស់លោក និងប្អូនស្រីមានតូបលក់ដូរចំនួន៣នៅក្នុងផ្សារស្រុកភ្នំព្រឹកលក់សម្ភារអគ្គិសនី ប៉ុន្តែលោកនិងបងប្អូនយកអីវ៉ាន់ពីអណ្ដាតភ្លើងបានតិចតួចបំផុត ។ លោកបានបន្តថា ម្ចាស់តូបអាចរំដោះទ្រព្យសម្បត្តិបានតិចតួច តែតូបណាដែលនៅខាងៗ ។ រីឯតូបនៅខាងក្នុងមិនអាចចូលបានទេ ព្រោះអណ្ដាតភ្លើងបានឆេះសន្ធោសន្ធៅខ្លាំងពេក ហើយរថយន្តពន្លត់អគ្គិភ័យក៏មិនអាចជួយអន្តរាគមន៍បានទាន់ពេល ។ លោក ជា សុខ បានប៉ាន់ប្រមាណការខូចខាតទំនិញរបស់លោកដែលគិតជាប្រាក់អស់ប្រហែល៦ម៉ឺនដុល្លារអាមេរិក ។
ជុំវិញគ្រោះមហន្តរាយដោយអគ្គិភ័យខាងលើនេះ លោក រៀម សារ៉េត បានបញ្ជាក់ថា បើទោះជាអគ្គិភ័យនោះមិនអាចបង្ក្រាបបាន តែរថយន្តរបស់លោកចំនួន៣គ្រឿងបានចំណាយទឹកអស់ចំនួន១៨ជើង រីឯរថយន្តភាគីថៃចំនួន៤គ្រឿងបានចំណាយទឹកអស់៤៤ជើង ។ លោកឱ្យដឹងទៀតថា តូបនិងតួផ្សារទាំងមូលរាប់ទាំងទំនិញសព្វសារពើរបស់អាជីវករផង បានក្លាយជាចំណីព្រះអគ្គីទាំងស្រុងដែលគិតជាប្រាក់ប្រមាណ១,៧៩លានដុល្លារអាមេរិក ។
ទោះជាយ៉ាងណា បើតាមសេចក្ដីរាយការណ៍ថា នៅព្រឹកថ្ងៃទី២២ កក្កដា លោក ចាន់ សុផល អភិបាលខេត្ត បានដឹកនាំមន្ត្រីក្រោមឱវាទមួយក្រុមចុះទៅពិនិត្យទីកន្លែងកើតហេតុ និងសួរសុខទុក្ខក្រុមអាជីវកររងគ្រោះ ព្រមទាំងបាននាំយកអំណោយខ្លះៗទៅចែកជូនផងដែរ ៕
ចែករំលែកព័តមាននេះ