ខេត្តកំពង់ឆ្នាំង ៖ ស្រ្តីមានផ្ទៃពោះជិតគ្រប់ខែម្នាក់ បានដើរផុងជើងនឹងប្រលោះក្ការនៅលើផ្ទះ រួចដួលបោកក្បាលពេញទំហឹងនឹងជញ្ជាំង បណ្តាលឱ្យស្លាប់តាមផ្លូវ ខណៈដឹកទៅសង្គ្រោះនៅមន្ទីរពេទ្យ។ គ្រោះថ្នាក់ដ៏កម្រនេះបានកើតឡើងនៅវេលាម៉ោង២រំលងអធ្រាត្រ ឈានចូលថ្ងៃទី២០ កក្កដា នៅក្នុងភូមិត្រពាំងស្បូវ ឃុំស្រែថ្មី ស្រុករលាប្អៀរ ។
ក្រុមគ្រួសារស្រ្ដីរងគ្រោះឱ្យដឹងថា ជនរងគ្រោះមានឈ្មោះ លឿន ឡុន អាយុ៤០ឆ្នាំ រូបនាងមានផ្ទៃពោះជាង៩ខែហើយ កន្លងមកនាងធ្លាប់មានផ្ទៃពោះចំនួន៣ដង ប៉ុន្ដែកូនទាំងនោះមិនដែលគ្រប់ខែកើតមកទេ គឺបានរលូតស្លាប់ទាំងអស់។ ចំណែកប្ដីរបស់នាងឈ្មោះ មាស ចាន់ណា អាយុ៣១ឆ្នាំ មានមុខរបរជាកសិករ ដែលបានរៀបការជាមួយគ្នាជាង៤ឆ្នាំហើយ។
ប្រភពដដែលបន្តថា មុនពេលកើតហេតុរូបនាងបានក្រោកពីដំណេកទៅបត់ជើងតូច នៅពេលដើរលើផ្ទះក៏បានផុងជើងនឹងក្ដារក្រាលផ្ទះ ដែលប្រេះបែកជាពីរ បណ្ដាលឱ្យរូបនាងដួលទាំងជំហរបោកក្បាលនឹងជញ្ជាំងផ្ទះពេញទំហឹងសន្លប់បាត់មាត់រហូត ភ្លាមៗនោះដែរក្រុមគ្រួសារក៏បានដឹកនាងតាមរ៉ឺម៉កម៉ូតូយកទៅសង្រ្គោះនៅមន្ទីរពេទ្យខេត្ត ប៉ុន្តែពេលទៅដល់មន្ទីរពេទ្យខេត្តគ្រូពេទ្យប្រាប់ថារូបនាងបានស្លាប់ទៅហើយ បន្ទាប់មកក្រុមគ្រួសារបានដឹកសពនាងត្រឡប់មកផ្ទះវិញ ដើម្បីធ្វើបុណ្យតាមប្រពៃណី ទាំងក្តីអាឡោះអាល័យក្រៃលែង ៕
ចែករំលែកព័តមាននេះ