រាជធានីភ្នំពេញ ៖ មកទល់ពេលនេះ ស្ថាប័ន One Fighting Championship (One FC) ដែលជាស្ថាប័នប្រដាល់ក្បាច់គុនចម្រុះ MMA ដ៏ល្បីល្បាញនៅទ្វីបអាស៊ីកាន់តែបើកទូលាយយ៉ាងខ្លាំងឱ្យកីឡាករកម្ពុជាមានឱកាសឡើងប្រកួតនៅលើសង្វៀនប្រដាល់ដាក់ទ្រុងអន្តរជាតិរបស់ខ្លួន ។ ជាមួយនឹងភាពរីកចម្រើននៃវិស័យប្រដាល់នាពេលចុងក្រោយមានការងឿងឆ្ងល់យ៉ាងខ្លាំងថា ហេតុអ្វីបានជាកីឡាករកម្ពុជា បែរជាមិនមានសមត្ថភាពប្រកបដោយស្ដង់ដាក្នុងការប្រកួតដាក់ទ្រុង MMA នេះទៅវិញ ?
កាលពីថ្ងៃទី១៤ កក្កដាកន្លងទៅ លោក Franklin ជាកីឡាករល្បីឈ្មោះក្នុងវិស័យឧស្សាហកម្មក្បាច់គុនចម្រុះរបស់ MMA និងជាអនុប្រធានស្ថាប័ន One FC មកពីសហរដ្ឋអាមេរិក បានចុះមកដល់កម្ពុជាដោយបានទាំងបណ្ដុះបណ្ដាលក្បាច់គុនចម្រុះ MMA មួយចំនួនរួចមកហើយដល់កីឡាករខ្មែរចំនួន២០រូបនៅក្នុងសណ្ឋាគារណាហ្គាវើល ។ ដំណើរចុះមកកាន់កម្ពុជារបស់មន្ត្រីជាន់ខ្ពស់ One FC នេះគឺបន្ទាប់ពីមើលឃើញថា វិស័យកីឡាប្រដាល់របស់ប្រទេសកម្ពុជាមានការរីកចម្រើនយ៉ាងខ្លាំង ប៉ុន្តែបែរជាខ្វះធនធានអ្នកមានសមត្ថភាពពិតប្រាកដដើម្បីឡើងប្រកួតដាក់ទ្រុងដែលពិភពលោកហាក់មានការចាប់អារម្មណ៍ជាងប្រដាល់សាកលនិងសេរីនាពេលនេះ ។
កន្លងមក ស្ថាប័នOne FC បានផ្ដល់ឱកាសដល់កីឡាករកម្ពុជាជាច្រើនរូបមកហើយឡើងប្រកួតប្រដាល់ដាក់ទ្រុងលើរេញ MMA នៅក្នុងប្រទេសឥណ្ឌូណេស៊ី ហ្វ៊ីលីពីន សិង្ហបុរី និងម៉ាឡេស៊ី ប៉ុន្តែគ្រប់ការបញ្ជូនកីឡាករខ្មែរទៅកាន់ព្រឹត្តិការណ៍នោះគឺមិនមានអ្នកណាម្នាក់ទទួលជ័យជម្នះទេ បើទោះជាកីឡាករដែលបានបញ្ជូនទៅនោះសុទ្ធសឹងតែជាជើងខ្លាំងដែលនៅក្នុងស្រុកស្ទើរតែគ្មានដៃគូ ។ យ៉ាងណាក៏ដោយ ស្ថាប័ននេះ ក៏បានកោតសរសើរចំពោះវិស័យកីឡាប្រដាល់នៅកម្ពុជាផងដែរថាមានការរីកចម្រើនផុលផុសគួរជាទីមោទនៈដែលស្ទើរតែនៅប្រទេសខ្លះមិនមានសន្ទុះខ្លាំងក្លាដូច ។ ក្នុងនោះកីឡាករឃីម ឌីម៉ា ក៏ក្លាយជាមុខសញ្ញានៃការសរសើរផងដែរ បើទោះជាការប្រកួតទាំង៣លើករបស់គេគឺចាញ់ទាំងបីលើក និងបានជាប់ចោទរឿងវាយខុសលក្ខន្តិកៈដែលនាំឱ្យមានចម្រូងចម្រាសម្ដងផងនោះ ។
មន្ត្រី One FC បញ្ជាក់មុនការចាកចេញថា បើមានការជំរុញគ្រប់គ្រាន់ កីឡាករកម្ពុជាសុទ្ធតែជាធនធាន ដែលមានសមត្ថភាពឡើងរេញMMA ។ យោងតាមការវិភាគមន្ត្រីរូបនេះ ទំនងជាចង់និយាយទៅលើហេតុផលដែលកីឡាករកម្ពុជាមិនមានលទ្ធភាពបំពាក់បំប៉នខ្លួនពួកគេ ឱ្យមានគុណភាពគ្រប់គ្រាន់ ព្រោះតែបញ្ហាប្រាក់កម្រៃដែលបង្ខំឱ្យពួកគេវក់វីនឹងការងារប្រើកម្លាំងនៅខាងក្រៅដើម្បីជីវិតច្រើនជាង ។ ដូចគ្នាដែរកីឡាករភាគច្រើនក៏ធ្លាប់បញ្ជាក់ដែរថា បើការប្រដាល់អាចឱ្យគេមានជីវភាពមួយល្អប្រសើរគឺគ្មានអ្នកណាចេញឆ្ងាយពីការហ្វឹកហាត់នោះដែរ បើតាមតែចិត្ដស្រឡាញ់ប្រដាល់នោះ ។ ក្រុមគ្រូបង្វឹកមួយចំនួនបានបញ្ជាក់ប្រាប់កោះសន្ដិភាពដោយមិនឱ្យបញ្ចេញឈ្មោះថា កីឡាករនៅស្រុកខ្មែរមិនអាចខ្លាំងដូចការចង់បាននោះទេ ដោយសារប្រាក់ចំណូលតិច បញ្ហាខ្សែទុយោក្នុងការផ្គូផ្គងមានមិនចេះអស់ បញ្ហាថ្លៃទឹកតែតាមថ្នាក់ៗដើម្បីបានប្រកួតគូល្អ និងមួយទៀតគឺបញ្ហាខ្ជះខ្ជាយរបស់កីឡាករខ្លួនឯងផ្ទាល់តែម្ដង។
មួយចំនួនធំនៃកីឡាករសំអាងថាបានចំណូលតិច គិតតែជ្រើសយកមធ្យោបាយផឹកមុន និងក្រោយការប្រកួតដើម្បីកុំឱ្យចំណាយថ្លៃមើលខ្លួនបំបាត់ការឈឺសាច់ ។ ក្នុងនោះបញ្ហាប្រាក់ចំណូលមន្ត្រីប្រចាំសហព័ន្ធមិនមានតុល្យភាពនឹងការរីកចម្រើននៃវិស័យប្រដាល់ក៏ជាកត្តាធ្វើឱ្យការផ្ទេរចំណេះដឹងពីគ្រូបង្វឹកទៅសិស្សក្លាយជាបញ្ហាចោទផងដែរ ។ លោកតែម ម៉ឺន ប្រធានសហព័ន្ធកីឡាប្រដាល់កម្ពុជា បានទទួលស្គាល់ចំពោះបញ្ហាខាងលើ ប៉ុន្តែលោកថានោះគឺបណ្ដាលមកពីចំណូលជាក់ស្ដែងដែលបានពីក្រុមហ៊ុន និងទូរទស្សន៍ដែលរៀបចំការប្រដាល់មិនអាចឱ្យសហព័ន្ធដំឡើងប្រាក់កម្រៃដល់កីឡាករ និងក្រុមមន្ត្រីការងារបានតែប៉ុណ្ណោះ ។
យ៉ាងណាក៏ដោយ លោកបានស្វះស្វែងរកក្រុមហ៊ុនឱ្យរៀបចំការប្រកួតដណ្ដើមប្រាក់លាននិងរកប្រភពពង្រីកការប្រដាល់ឱ្យបានច្រើនសង្វៀនដើម្បីឱ្យកីឡាករ និងមន្ត្រីទាំងមូលមានការងារច្រើនធ្វើដើម្បីបង្កើនប្រាក់ចំណូល ។ លោកនៅតែមានជំនឿថា ធនធានកីឡាករប្រដាល់នៅកម្ពុជានឹងល្អប្រសើរ ដែលចង់សំដៅថា ពួកគេនឹងចូលខ្លួនលើរេញ One FC ប្រកបដោយសមត្ថភាពស្ដង់ដា ៕
ចែករំលែកព័តមាននេះ