រាជធានីភ្នំពេញ ៖ ព្រឹត្តិការណ៍ប្រកួតកីឡាមហាជនជ្រើសរើសជើងឯកប្រចាំភូមិភាគក្របខ័ណ្ឌក-២ប្រចាំឆ្នាំ២០១៤ នៅមណ្ឌលរាជធានីភ្នំពេញ ដែលបានចាប់ផ្តើមតាំងពីថ្ងៃទី៩ កក្កដា មកនោះ បានបញ្ចប់ជាផ្លូវការហើយ ។ ពិធីបិទការប្រកួតត្រូវបានគេរៀបចំធ្វើ កាលពីរសៀលថ្ងៃទី២១ កក្កដា នៅក្នុងវិមាននៃពហុកីឡដ្ឋានជាតិ ក្រោមអធិបតីភាពលោក ប៊ូ ជុំសេរី អនុរដ្ឋលេខាធិការក្រសួងអប់រំយុវជន និងកីឡា ដោយមានការចូលរួមពីមន្ត្រីកីឡាពាក់ព័ន្ធ សាកលវិទ្យាធិការនៃសាកលវិទ្យាល័យនានា និងកីឡាករ-កីឡាការិនីយ៉ាងច្រើនកុះករ ។
តាមរបាយការណ៍បានឱ្យដឹងថា ការប្រកួតកីឡាមហាជនក្របខ័ណ្ឌ-២ ជ្រើសរើសជើងឯកប្រចាំឆ្នាំ២០១៤នៅមណ្ឌលរាជធានីភ្នំពេញលើប្រភេទកីឡាបាល់ទះ បាល់ទាត់ បាល់បោះ និងអត្តពលកម្មខាងលើនេះ មានកីឡាករ-កីឡាការិនីចូលរួមសរុបចំនួន២៧៦នាក់ ក្នុងនោះកីឡាការិនីមានចំនួន៤២នាក់ ។ សម្រាប់អត្តពលិកដែលបានដាក់ពាក្យចូលរួមប្រកួតលើប្រភេទកីឡាបាល់ទះមាន៤ក្រុម, បាល់ទាត់៦ក្រុម, បាល់បោះ២ក្រុម និងអត្តពលកម្ម៧ក្រុម ។ ចំពោះលទ្ធផលដែលទទួលបាន ទោះបីវាមិនទាន់ឆ្លើយតបដល់កម្រិតដែលចង់បានក៏ពិតមែន ប៉ុន្តែយើងអាចសន្និដ្ឋាន និងវាយតម្លៃលើកម្រិតបច្ចេកទេសឃើញថា លទ្ធផលនេះអាចទទួលយកបានសម្រាប់ទៅចូលរួមប្រកួតជ្រើសរើសជើងឯកថ្នាក់ជាតិប្រចាំឆ្នាំ២០១៤ នៅខេត្តកំពត ដែលនឹងចាប់ផ្តើមនាដើមខែសីហាខាងមុខនេះ ។
សម្រាប់លទ្ធផលដំណាត់ថ្នាក់មានដូចខាងក្រោម ៈ ប្រភេទកីឡាបាល់បោះ លេខ១បានទៅក្រុមមន្ទីរអប់រំយុវជន និងកីឡារាជធានីភ្នំពេញ និងលេខ២បានទៅក្រុមសម្ព័ន្ធគណៈកម្មាធិការសម្របសម្រួលនិស្សិតបញ្ញវ័ន្តកម្ពុជា ។ ប្រភេទកីឡាបាល់ទះ លេខ១បានទៅក្រុមមន្ទីរអប់រំយុវជន និងកីឡា រាជធានីភ្នំពេញ, លេខ២បានទៅក្រុមវិទ្យាស្ថានជាតិអប់រំកាយ និងកីឡា និងលេខ៣បានទៅក្រុមសាកលវិទ្យាល័យវេស្ទើន ។ ប្រភេទកីឡាបាល់ទាត់ លេខ១បានទៅក្រុមសហភាពសហព័ន្ធយុវជនកម្ពុជាខេត្តព្រៃវែង, លេខ២បានទៅក្រុមសម្ព័ន្ធគណៈកម្មាធិការសម្របសម្រួលនិស្សិតបញ្ញវ័ន្តកម្ពុជា និងលេខ៣បានទៅក្រុមមន្ទីរអប់រំយុវជន និងកីឡា រាជធានីភ្នំពេញ ។
ចំពោះប្រភេទកីឡាអត្តពលកម្មដែលមានវិញ្ញាសា រត់ល្បឿន, លោតកម្ពស់, លោតចម្ងាយ, ចោលដុំដែក និងដើរចម្ងាយនោះ យើងសូមលើកយកតែចំណាត់ថ្នាក់ជាក្រុមតែប៉ុណ្ណោះ ក្នុងនោះលេខ១បានទៅក្រុមក្រសួងការពារជាតិ, លេខ២បានទៅក្រុមសាកលវិទ្យាល័យអាស៊ីអឺរ៉ុប និងលេខ៣ បានទៅក្រុមសាកលវិទ្យាល័យធនធានមនុស្ស ។ លោក ប៊ូ ជុំសេរី បានមានប្រសាសន៍ថា ការប្រកួតនៅមណ្ឌលរាជធានីភ្នំពេញ នាពេលនេះ មិនគ្រាន់តែជ្រើសរើសបាននូវកីឡាករ-កីឡាការិនីឆ្នើមប៉ុណ្ណោះទេ ប៉ុន្តែការប្រកួតបានផ្តល់ឱ្យយើងទាំងអស់គ្នាចេះរាប់អានគ្នា សាមគ្គីគ្នា និងដកស្រង់បច្ចេកទេសពីគ្នាទៅវិញទៅមក ។ លោកបានផ្តាំផ្ញើដល់កីឡាករ-កីឡាការិនីទាំងអស់ ដែលទទួលបានជ័យលាភី ត្រូវខិតខំហ្វឹកហាត់បន្តទៀត ដើម្បីត្រៀមទៅចូលរួមប្រកួតកីឡាថ្នាក់ជាតិនៅខេត្តកំពត នាពេលខាងមុខ ហើយចំពោះអត្តពលិកដែលមិនទាន់ទទួលបានជ័យលាភីនៅពេលនេះ ត្រូវហ្វឹកហាត់ឱ្យបានខ្លាំងក្លាថែមទៀតដើម្បីទទួលបានលទ្ធផលល្អនៅពេលក្រោយ ។
សូមបញ្ជាក់ផងដែរថា អង្គភាព និងសមាគមដែលបានចូលរួមក្នុងព្រឹត្តិការណ៍នេះមានចំនួន១៣ដូចជា ក្រសួងការពារជាតិ, ក្រសួងមហាផ្ទៃ, តុលាការយោធា, បញ្ជាការដ្ឋានកងកាំភ្លើងធំ, សាកលវិទ្យាល័យធនធានមនុស្ស, សហភាពសហព័ន្ធយុវជនកម្ពុជាខេត្តព្រៃវែង, សម្ព័ន្ធគណៈកម្មាធិការសម្របសម្រួលនិស្សិតបញ្ញវ័ន្តកម្ពុជា, សាកលវិទ្យាល័យវេស្ទើន, អង្គការដើម្បី ភាពញញឹមនៃកុមារ, វិទ្យាស្ថានជាតិអប់រំកាយ និងកីឡា, អាកាសចរស៊ីវិល, សាកលវិទ្យាល័យអាស៊ីអឺរ៉ុប និងមន្ទីរអប់រំយុវជន និងកីឡា រាជធានីភ្នំពេញ ៕
ចែករំលែកព័តមាននេះ