កីឡាករប្រដាល់ទម្ងន់ធ្ងន់អង់គ្លេស ឌីរ៉េក ស៊ីសូរ៉ា បានលុបចោលការប្រកួតការពារខ្សែក្រវាត់ស្ថាប័ន EBU របស់ខ្លួនជាមួយកីឡាករមិត្តរួមជាតិថៃសាន់ ហ្វឺរី បន្ទាប់ពីរងរបួសបាក់ឆ្អឹងដៃអំឡុងពេលហាត់សម ។ សូមបញ្ជាក់ថា កីឡាកររូបនេះគ្រោងប្រកួតការពារខ្សែក្រវាត់ទម្ងន់ធ្ងន់ទ្វីបអឺរ៉ុបរបស់ខ្លួនប្រឆាំងនឹងថៃសាន់ ហ្វឺរី នៅថ្ងៃទី២៦ កក្កដា ចុងសប្តាហ៍នេះនៅក្រុង Manchester ប្រទេសអង់គ្លេស ប៉ុន្តែការរងរបួសរបស់គេនៅពេលនេះមានន័យថា ការប្រកួតនឹងត្រូវលើកពេល ។
នៅក្នុងសេចក្តីថ្លែងការណ៍មួយ ស៊ីសូរ៉ា បានបញ្ជាក់ថា ៖ «ខ្ញុំពិតជាអស់សង្ឃឹមយ៉ាងខ្លាំងដែលមិនអាចថ្លែងបានចំពោះការដកខ្លួនពីការប្រកួតលើកនេះ ។ ប៉ុន្តែខ្ញុំធ្វើបែបនេះ គឺយោងទៅតាមដំបូន្មានពីអ្នកជំនាញ ។ ខ្ញុំសូមទោសចំពោះអ្នកគាំទ្រដែលខកខានការប្រកួតនេះ ។ យ៉ាងណាក៏ដោយ នៅពេលដៃខ្ញុំជាសះស្បើយអាចហ្វឹកហាត់ និងប្រើការបានដូចដើម ខ្ញុំនឹងរើសយកថ្ងៃថ្មីសម្រាប់ការប្រកួត» ។ កីឡាករដើមកំណើតហ្ស៊ីមបាវេរូបនេះបានបន្តថា ៖ «ខ្ញុំត្រៀមខ្លួនបានយ៉ាងល្អ ជាគឺការហ្វឹកហាត់ដ៏ហ្មត់ចត់បំផុត ។ វាប្រហែលជាការហ្វឹកហាត់ដែលល្អជាងគេក្នុងអាជីពរបស់ខ្ញុំ ។ ក្តីសង្ឃឹមថា នឹងបានសងសឹកថៃសាន់ ហ្វឺរី នឹងត្រូវរងចាំទៅថ្ងៃក្រោយ ។ ខ្ញុំសោកស្តាយខ្លាំងណាស់ចំពោះការដកខ្លួនលើកនេះ ។ តាមខ្ញុំដឹង ហ្វឺរី ប្រឹងប្រែងហ្វឹកហាត់ខ្លាំងណាស់» ។
អ្នករៀបចំការប្រកួតលោក Frank Warren បានថ្លែងថា ៖ «គ្រប់គ្នាដែលជាប់ពាក់ព័ន្ធក្នុងការប្រកួតលើកនេះបានប្រឹងប្រែងខ្លាំងណាស់ ហើយខណៈដែលរឿងនេះបានកើតឡើងនៅសប្តាហ៍ចុងក្រោយបែបនេះ វាពិតជារឿងអស់សង្ឃឹមដ៏ធំមួយ ។ វាមិនអាចទៅរួចទេដែលកីឡាករស៊ីសូរ៉ា ប្រកួតទាំងបាក់ឆ្អឹងដៃ ហើយខ្ញុំក៏មិនអនុញ្ញាតឱ្យរូបគេឡើងរេញក្នុងស្ថានភាពរបួសដូច្នេះដែរ ។ ពិតណាស់ អ្នកដែលអស់សង្ឃឹមខ្លាំងបំផុត គឺកីឡាករថៃសាន់ ហ្វឺរី និងក្រុមរបស់គេ» ។
សូមបញ្ជាក់ថា ស៊ីសូរ៉ា មានឯតទគ្គកម្មប្រកួត២៤លើក ឈ្នះ២០លើក ចាញ់៤ ផ្តួលដៃគូឱ្យសន្លប់១៣លើក ខណៈហ្វឺរី ២២ប្រកួត មិនដែលចាញ់ និងធ្លាប់ផ្តួលដៃគូឱ្យសន្លប់ចំនួន ១៦លើក៕
ចែករំលែកព័តមាននេះ