ស្ថិតក្នុងវ័យ៣៤ឆ្នាំ ជាមួយនឹងទឹកមុខស្រគត់ស្រគំ កីឡាករដែលមានសីលធម៌ល្អ ស្ទីវិន ជឺរា៉ដ បានប្រកាសចូលនិវត្តន៍ពីក្រុមជម្រើសជាតិហើយ កាលពីថ្ងៃអង្គារ ទី២២ កក្កដា ឆ្នាំ២០១៤ បន្ទាប់ពីលេងឱ្យក្រុមជម្រើសជាតិបាន១១៤លើក ក្នុងរយៈពេល១៤ឆ្នាំកន្លងមកនេះ ។
ជឺរា៉ដ បាននិយាយថា ៖ «វាគឺជាការសម្រេចចិត្តដ៏លំបាកបំផុត ក្នុងជីវិតរបស់ខ្ញុំ ក្នុងការដើរចេញពីក្រុមជម្រើសជាតិ ហើយនេះមិនមែនដោយសារហេតុផលការទទួលលទ្ធផលមិនល្អនៃការប្រកួតបាល់ទាត់ពិភពលោកនៅប្រេស៊ីលនោះទេ» ។ កីឡាករ ជឺរា៉ដ ក្លាយជាកីឡាករជម្រើសជាតិទី៥ ដែលគ្រងតំណែងប្រធានក្រុមយូរបំផុតក្នុងចំណោមកីឡាករ១០នាក់ ខណៈកីឡាករ Bobby Moore ឈរលំដាប់លេខ១ ។ ចំណែកឯការបង្ហាញវត្តមានក្នុងក្រុមជម្រើសជាតិវិញ កីឡាករ ជឺរា៉ដ ឈរលំដាប់លេខ៣ បន្ទាប់ពីកីឡាករ ភីតធ័រ ស៊ីលតុន (១២៥លើក) និងកីឡាករ ដេវីដ បេកខាំ (១១៥លើក) ។
ទោះបីលាឈប់ពីក្រុមជម្រើសជាតិក្តី កីឡាករ ជឺរា៉ដ នៅបន្តអាជីពក្នុងក្លិប Liverpool ដដែល ។ ជាមួយនឹងការប្រកាសចូលនិវត្តន៍កីឡាករមុខស្លូតរូបនេះនឹងទទួលបានមុខតំណែងជាឯកអគ្គរដ្ឋទូតបាល់ទាត់របស់សហគមបាល់ទាត់អង់គ្លេស ៕
ចែករំលែកព័តមាននេះ