សារព័ត៌មានបរទេសកាលពីថ្ងៃទី១៩ កក្កដា ២០១៤ ផ្សាយថា ក្មេងប្រុសសាណេឡេ ម៉ាស៊ីឡេឡា អាយុ៩ឆ្នាំ បានរៀបការជាមួយស្ត្រីឈ្មោះហេឡែន សាបានគូ អាយុ៦២ឆ្នាំ ជាលើកទី២ ក្រោយពីអ្នកទាំងពីរបានរៀបការតាមទំនៀមទម្លាប់ម្តងមកហើយកាលពីថ្ងៃបុណ្យនៃសេចក្តីស្រឡាញ់ឆ្នាំមុន ។
អ្នកស្រីហេឡែន សាបានគូ មានកូន៥នាក់ពី២៨ ដល់៣៨ឆ្នាំ ។ បន្ទាប់ពីរៀបអាពាហ៍ពិពាហ៍រួចកាលពីឆ្នាំមុន អ្នកទាំងពីរបានរស់នៅដាច់ដោយឡែកពីគ្នាជាលក្ខណៈធម្មតា ។ មូលហេតុដែលនាំឱ្យក្មេងប្រុសសាណេឡូ ម៉ាស៊ីឡេឡា រៀបការជាលើកទីពីរ គឺដោយសារលោកតារបស់គេដែលបានស្លាប់ទៅហើយពន្យល់សប្តិប្រាប់ឱ្យគេរៀបការម្តងទៀត ព្រោះនៅពេលគាត់នៅមានជីវិតមិនបានរៀបការទេ ។ ដោយសារបែបនោះហើយក្រុមគ្រួសារ និងក្មេងតូចព្រមព្រៀងគ្នារៀបចំពិធីមង្គលការជាលើកទី២ ព្រោះមានជំនឿថា បើមិនធ្វើដូច្នេះទេ វិញ្ញាណរបស់លោកតានឹងនាំក្មេងប្រុសម៉ាស៊ីឡេឡា ទៅនៅជាមួយ មានន័យថា គេនឹងស្លាប់មិនខាន ។
ពិធីរៀបមង្គលការរៀបចំឡើងនៅភូមិស៊ីមហាំងវ៉េ ក្រុងម៉ាភូម៉ាឡាងកា ភាគខាងកើតអាហ្វ្រិកខាងត្បូង ។ ក្មេងប្រុសម៉ាឡេស៊ីឡេឡា ជាកូនកំលោះស្ថិតក្នុងឈុតសម្លៀកបំពាក់ពណ៌ប្រផេះបានថើបកូនក្រមុំហេឡែន ស្ថិតក្នុងឈុតកូនក្រមុំពណ៌ស ។
ពិធីអាពាហ៍ពិពាហ៍នោះមានការចូលរួមពីភ្ញៀវកិត្តិយសប្រហែល១០០នាក់ ។ លោកអាល់ហ្វ្រេដ សាបានគូ អាយុ៦៦ឆ្នាំ ជាប្តីរបស់អ្នកស្រីហេឡែន ក៏បានចូលរួមក្នុងពិធីនោះដែរ ដោយលោកជួយចាត់ចែងពិធីរៀបការនោះទៀតផង ។ក្មេងប្រុសម៉ាស៊ីឡេឡា និយាយថា នៅពេលដែលគេធំឡើង គេនឹងរៀបការជាមួយកូនក្រមុំដែលមានអាយុប្រហាក់ប្រហែលគ្នា ។
ទោះបីជារូបគេបានរៀបការជាមួយអ្នកស្រីហេឡែន ក៏ដោយ បុ៉ន្តែគេនៅតែទៅសាលារៀន ។ មូលហេតុដែលធ្វើឱ្យរូបគេជ្រើសយកអ្នកស្រីហេឡែន ជាកូនក្រមុំ ព្រោះរូបគេពេញចិត្ត គាត់ ទោះបីមិនបានរស់នៅរួមគ្នាជារៀងរហូតក៏ដោយ ។ រូបគេបានជួបអ្នកស្រីហេឡែន នៅក្បែរកន្លែងចោលសំរាមដែលជាកន្លែងម្តាយរបស់គេធ្វើការ ៕
ចែករំលែកព័តមាននេះ