រាជធានីភ្នំពេញ ៖ ជនសង្ស័យ២នាក់ត្រូវបានប្រជាពលរដ្ឋសហការជាមួយនគរបាលប៉ុស្តិ៍រដ្ឋបាលផ្សារថ្មី១ចាប់បានភ្លាមៗខណះពេលពួកគេបានធ្វើសកម្មភាពឆក់កាបូបស្ពាយពីស្ត្រីម្នាក់កំពុងតែដើរដល់ផ្លូវលេខ៥១ កែងផ្លូវលេខ១១៨ ស្ថិតក្នុងភូមិ៧ សង្កាត់ផ្សារថ្មីទី១ ខណ្ឌដូនពេញ កាលពីវេលាម៉ោង៩និង៣០នាទី ព្រឹកថ្ងៃទី២១ ខែកក្កដា ឆ្នាំ២០១៤ ។
នគរបាលប៉ុស្តិ៍រដ្ឋបាលផ្សារថ្មី១បានឲ្យដឹងថា ជនសង្ស័យដែលឆក់កាបូបស្ពាយ ឈ្មោះឆៃ មនោវណ្ណ ភេទប្រុស អាយុ២៣ឆ្នាំ មុខរបរនិស្សិតសកលវិទ្យាល័យជាតិគ្រប់គ្រង ស្នាក់នៅផ្ទះលេខ២៦៤អឺ ផ្លូវលេខ១២៨សង្កាត់ទឹកល្អក់២ ខណ្ឌទួលគោក (ជាអ្នកបើកម៉ូតូ) និងឈ្មោះសុខ សាន មុខរបរកម្មករស្នាក់នៅសំយ៉ាបផ្សារនាគមាស ខណ្ឌទួលគោក (ជាអ្នកឆក់) ត្រូវបានដកហូតកាបូបស្ពាយរបស់ជនរងគ្រោះមកវិញ និងម៉ូតូដែលពួកគេជិះឆក់មួយគ្រឿង ម៉ាកស្គុបពី ពណ៌ឈាមជ្រូក ពាក់ស្លាកលេខព្រៃវែង១D-៦០៥៦ ។
យោងតាមបណ្តឹងជនរងគ្រោះ ឈ្មោះ ប៊ុន ហោលី ភេទស្រី អាយុ៥៥ឆ្នាំ មុខរបរលក់ដូរស្នាក់នៅខេត្តកំពង់ស្ពឺបានឱ្យសមត្ថកិច្ចដឹងថា មុនពេលកើតហេតុស្ត្រីរងគ្រោះបានដើរចេញពីផ្សារធំថ្មី តាមផ្លូវលេខ១១៨ ស្រាប់តែខណៈនោះមានជនសង្ស័យ២នាក់ជិះម៉ូតូមកឆក់ផ្តាច់យកកាបូបរបស់ជនរងគ្រោះបណ្ដាលឲ្យជនរងគ្រោះដួលរបួសបោកទៅលើថ្នល់ ចំណែកជនសង្ស័យក្រោយពីឆក់កាបូបបានហើយខំព្យាយាមបើករត់បានបន្តិចស្រាប់តែភ្លាត់ស្នៀតដួលម៉ូតូ ប្រកាច់ប្រកិន។ស្របពេលស្ត្រីរងគ្រោះព្យាយាមស្រែកឆោឡោឡើងថា”ជួយចោរឆក់កាបូប”ភ្លាមៗនោះប្រជាពលរដ្ឋធ្វើដំណើរជួយដេញចាប់បានជនសង្ស័យទាំង២នាក់ហើយនាំគ្នាវាយម្នាក់មួយដៃមួយជើងបណ្ដាលឲ្យបែកមុខមាត់ហូរឈាមរហាម។
ចែករំលែកព័តមាននេះ