របាយការណ៍នៃការសិក្សាស្រាវជ្រាវថ្មីមួយបានបង្ហាញថា ការរក្សាសកម្មភាពរាងកាយជាប្រចាំនិងទៀងទាត់ទំនងជាអាចបញ្ចៀសនូវហានិភ័យកើតមានជំងឺបេះដូងនៅថ្ងៃអនាគតសម្រាប់ស្ត្រីដែលឈានដល់វ័យចាប់ពី៣០ឆ្នាំឡើងទៅ ។ តាមរយៈការពិនិត្យមើលពីអាយុកាលមធ្យមស្ត្រីអូស្ត្រាលីជាង៣ម៉ឺន២ពាន់នាក់ ក្រុមអ្នកស្រាវជ្រាវសាកលវិទ្យាល័យ Queensland បានរកឃើញថា រាងកាយគ្មានសកម្មភាពបានដើរតួជាកត្តាហានិភ័យនាំមុខសម្រាប់ជំងឺបេះដូងលើគ្រប់ស្ត្រីដែលមានវ័យពី៣០ឆ្នាំដល់៨០ឆ្នាំ ។
លោកស្រី Wendy Brown អ្នកដឹកនាំការសិក្សានិងជានាយកមជ្ឈមណ្ឌលស្រាវជ្រាវពីការហាត់ប្រាណ ការធ្វើសកម្មភាពរាងកាយនិងបេះដូងបានថ្លែងថា ៖«យើងត្រូវតែដាស់តឿនឱ្យមនុស្សគ្រប់រូបនាំគ្នាធ្វើសកម្មភាពរាងកាយឱ្យបានច្រើនឡើង ។ ចាប់ពីអាយុប្រហែលជា៣០ឆ្នាំឡើងទៅ កម្រិតនៃការធ្វើសកម្មភាពរាងកាយរបស់មនុស្សស្ទើរគ្រប់រូបបានថយចុះ ។ ដូច្នេះ យើងចាំបាច់ត្រូវធ្វើអ្វីគ្រប់យ៉ាងដើម្បីទប់ស្កាត់បញ្ហានេះ »។
ចុះផ្សាយក្នុងព្រឹត្តិបត្រអនឡាញអង់គ្លេស ឈ្មោះ Sports Medicine ក្រុមអ្នកស្រាវជ្រាវបានធ្វើសេចក្តីសន្និដ្ឋានរួមថា ចាប់ពីអាយុ៣០ឆ្នាំរហូតដល់៨៨-៨៩ឆ្នាំ កម្រិតសកម្មភាពរាងកាយធ្លាក់ចុះទាបគឺជាអ្នកទទួលខុសត្រូវលើហានិភ័យជំងឺបេះដូងក្នុងកម្រិតមួយខ្ពស់ជាងកត្តាហានិភ័យផ្សេងទៀត ។ ពួកគេបានបញ្ជាក់ថា អសកម្មភាពរាងកាយ បង្កើនហានិភ័យកើតមានជំងឺបេះដូងដល់ស្ត្រីវ័យកណ្តាលជាមធ្យម៣៣ភាគរយខណៈស្ត្រីវ័យចំណាស់កើតហានិភ័យ២៤ភាគរយ ។ ប្រសិនជារាល់ស្ត្រីគ្រប់រូបអាយុចន្លោះពី៣០ទៅ៩០ឆ្នាំធ្វើសកម្មភាពរាងកាយកម្រិតមធ្យមយ៉ាងហោចណាស់១៥០នាទីក្នុងមួយសប្តាហ៍ ដូច្នេះជីវិតស្ត្រីទាំងវ័យកណ្តាលនិងវ័យចាស់ច្រើនជាង២ពាន់នាក់(គិតតែនៅប្រទេសអូស្ត្រាលីម្នាក់ឯង)ក្នុងមួយឆ្នាំត្រូវបានជួយសង្គ្រោះ ។
លោកស្រី Brown បានគូសបញ្ជាក់ថា ប្រភេទលំហាត់ប្រាណមិនចោទជាបញ្ហាទេ ។ អ្វីដែលសំខាន់គឺធ្វើយ៉ាងណារក្សាសកម្មភាពរាងកាយជាប់ជាប្រចាំ ។ លោកស្រីបន្តថា ៖«លំហាត់ប្រាណអ៊ែរ៉ូប៊ិកគឺពិតជាសំខាន់ចំពោះសុខភាពបេះដូងនិងសុខភាពរំលាយអាហារខណៈលំហាត់ប្រាណបង្កើនកម្លាំងផ្តល់សារសំខាន់ដល់សុខភាពប្រព័ន្ធគ្រោងឆ្អឹងនិងសាច់ដុំ »៕
ចែករំលែកព័តមាននេះ