រាជធានីភ្នំពេញ ៖ លោកឈឿម ណារិទ្ធ ជាអ្នកចម្រៀង ដែលក្រេះក្រិនក្នុងអាជីព គឺមិនអាចក្លាយជាតារាភ្លឺចែងចាំងបាន ។ លោកសោកស្តាយចំពោះពេលវេលាអតីតកាល ដែលបណ្តោយខ្លួនឱ្យគេប្រើទទេ គ្មានបានផលប្រយោជន៍អ្វីសោះ និងធ្វើឱ្យបាត់បង់ឱកាសរីកចម្រើននៃអាជីពរបស់ខ្លួន ។
លោកឈឿម ណារិទ្ធ កាលពីពេល ថ្មីៗនេះបានឱ្យដឹងថា លោកបានចូលក្នុងពិភពសិល្បៈឆ្នាំ២០០៤ ដោយពីដំបូងមិនទាន់ច្រៀងទេ គឺបានប្រឡងជាប់ក្នុងកម្មវិធីមួយរបស់ទូរទស្សន៍ប៉ុស្តិ៍លេខ៩ ដែលមានលោក ចេវ វីរៈ ជាអ្នកគ្រប់គ្រង គឺកម្មវិធី«តារាផ្កាយមាស» ។ កម្មវិធីនោះមានច្រៀងផង មានសម្តែងផង ហើយលោកជាប់ចំណាត់ថ្នាក់លេខ៣ ។ លុះពេលជាប់ក្នុងកម្មវិធីហើយ អ្នកជាប់ទាំងប៉ុន្មាន ត្រូវលោក ចេវ វីរៈ ដែលជាអ្នកគ្រប់គ្រងសន្យាថា នឹងនាំទៅថតភាពយន្តឱ្យលោក ។ ការទន្ទឹងរង់ចាំនោះ កាន់តែ យូរទៅៗ ទីបញ្ចប់អត់បានថតទេ តែគាត់ឱ្យលោកជួយធ្វើពិធីករនៅទូរទស្សន៍ប៉ុស្តិ៍លេខ៩ ដូចជាកម្មវិធីកញ្ញាឯក ប្រ៊ីតស្តុន ជាដើម។ យូរទៅ លោកអត់បានប្រយោជន៍អ្វីសោះ បានតែគេបោកទុកប្រើទទេ ។ អំឡុងពេលនោះ លោក ណុប សម្បត្តិ ហៅលោកទៅថតរឿងភាគឱ្យទូរទស្សន៍ស៊ីធីអិន តែលោកអត់ទទួលទេ ដោយសារតែស្មោះត្រង់នៅឱ្យគេប្រើទទេ ។
ក្រោយមក លោក ណារិទ្ធ បានដាក់ពាក្យចូលសាកសំឡេង នៅផលិតកម្មស្ទឹងសង្កែ ហើយត្រូវគេជ្រើសរើសយកកាលពីឆ្នាំ២០០៧ ។ អំឡុងពេលនោះ លោកច្រៀងបានច្រើនបទដែរ ជាបទសម្រាប់បុណ្យចូលឆ្នាំខ្មែរ និងថតលក់ទៅក្រៅស្រុក តែបានតែមួយរយៈប៉ុណ្ណោះ ព្រោះផលិតកម្មបិទទ្វារ ។ អំឡុងពេលលោកច្រៀងឱ្យផលិតកម្មរស្មីស្ទឹងសង្កែ លោកបានឡើងច្រៀងជាកិត្តិយសនៅទូរទស្សន៍ប៉ុស្តិ៍លេខ៥ ជាញឹកញាប់ ក្រៅពីនោះមានទូរទស្សន៍បាយ័ន ក្នុងកម្មវិធីតន្ត្រីស្រុកស្រែ ។ ក្រោយមក លោកហាក់ដូចជាដាច់ការទាក់ទង ហើយលែងបានឡើងច្រៀង ។
អ្នកចម្រៀងមានប្រភពពីទីរួមខេត្តបាត់ដំបងរូបនេះ ឱ្យដឹងថា សព្វថ្ងៃនេះលោកកំពុងតែច្រៀងនៅក្លឹបរាត្រីស៊ីធីឡាយ ក្នុងរាជធានីភ្នំពេញ ។ លោកមានគម្រោងចេញទៅសម្តែងនៅប្រទេសអូស្ត្រាលី ជាមួយនាងតុ និងរ៉ូលីន នាពេលខាងមុខ ព្រោះលោកចេះបទជំនាន់លោកស៊ីន ស៊ីសាមុត ច្រើន ។ លោកប្រឹងប្រែងជាមួយអាជីពសិល្បៈ ចម្រៀង ព្រោះជាការងារអាចរកប្រាក់បានសម្រាប់ចិញ្ចឹមជីវិត ។
លោកឈឿម ណារិទ្ធ សោកស្តាយដែលជួបរឿងស៊យ ធ្វើឱ្យអាជីពសិល្បៈក្រេះក្រិន នាពេលកន្លងមក ព្រោះតែជឿតាមអ្នកដឹកនាំកម្មវិធី នោះ ។ លោកបាត់បង់ឱកាសរីកចម្រើនក្នុងអាជីព ប៉ុន្តែលោកនៅតែប្រឹងប្រែងបន្តទៀត ។ មិត្តភក្តិដែលច្រៀងជំនាន់លោក ល្បីឈ្មោះច្រើន អាប់រាសីតែលោកម្នាក់ មកពីលោកតាមគេ ពេក ។ បើសិនជាលោកមិនគោរពគេនោះ ច្បាស់ជាលោកអាចមានពន្លឺក្នុងពិភពសិល្បៈ ។ ពេលដែលលោកមានគេស្គាល់នោះ ត្រូវម្ចាស់ផលិតកម្មហៅទៅសម្តែងច្រើនដូចជា លោក ហ្វៃ សំអាង ក៏ធ្លាប់ទាក់ទងដែរ តែលោកថា ជាប់រវល់ធ្វើការឱ្យគេហើយ ។
លោកឈឿម ណារិទ្ធ និយាយថា «ទីបំផុត ខ្ញុំបានត្រឹមតែសោកស្តាយ និងឈឺចាប់ មិនគួរណាអ្នកដឹកនាំកម្មវិធីគាត់ធ្វើបែបនេះដាក់ខ្ញុំទេ ហើយនារីជាតារា ផ្សេងៗទៀត ក៏ជួបនឹងការខកចិត្តដូចខ្ញុំដែរ ឱ្យតែតាមគាត់នោះ» ៕
ចែករំលែកព័តមាននេះ