រាជធានីភ្នំពេញ ៖ បុរស-នារីពីរនាក់ជិះម៉ូតូឌុបគ្នាចេញពីផ្ទះទៅរកញាំចំនីអាហារនៅខាងក្រៅផ្ទះ ត្រូវបានក្រុមជនសង្ស័យធ្វើសកម្មភាពឆក់កាបូបស្ពាយ តាមផ្លូវប៉ុន្តែមិនបានសម្រេច ក៏នាំគ្នាជិះម៉ូតូគេចខ្លួនអស់ទៅ ។ហេតុការណ៍នេះកើតឡើងកាលពីវេលាម៉ោង ១០យប់ ថ្ងៃទី ១០ កក្កដា ២០១៤នៅចំណុចរង្វង់មូលវត្តសំពៅមាស តាមផ្លូវ១៦៣ ស្ថិតក្នុងសង្កាត់វាលវង់ ខណ្ឌ៧មករា ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញបុរស-នារី ២នាក់នេះបានឌុបគ្នា ចេញទៅរកញាំចំនីអាហារនៅខាងក្រៅ ដោយជិះម៉ូតូ ម៉ាកស្តេប មួយគ្រឿង ពាក់ស្លាកលេខភ្នំពេញ 1AQ-1169 ដោយធ្វើដំណើរតាមផ្លូវ១៦៣ ក្នុងទិសដៅ ពីជើងទៅ ត្បូងមកដល់ចំណុចកើតហេតុក៏លេចមុខជនសង្ស័យមួយក្រុមមានគ្នាប្រមាណជិត ១០នាក់ ដោយក្នុងនោះគេឃើញអ្នកជិះម៉ូតូហុងដាសេ ១២៥ បានធ្វើសកម្មភាពឆក់កាបូបពីជនរងគ្រោះ ។ ប៉ុន្តែដោយម្ចាស់កាបូបចិត្តសឿងក៏បានទាញកាបូបទៅវិញទៅមកជាមួយជនសង្ស័យ រហូតធ្វើឱ្យជនសង្ស័យដួលម៉ូតូ ពេលនោះដែរក៏មានបក្សពួកជនសង្ស័យម្នាក់ទៀតបានលើកកាំភ្លើងសំដៅបាញ់បុរសរងគ្រោះប៉ុន្តែបាញ់មិនត្រូវ ក៏នាំគ្នាលើកម៉ូតូជិះគេចខ្លួនបាត់អស់ទៅ ។
ក្រោយពេលកើតហេតុជនរងគ្រោះរបួសស្រាល ត្រូវនាំទៅសង្រ្គោះនៅម្ទីរពេទ្យ ។ជនរងគ្រោះត្រូវសមត្ថកិច្ចមូលដ្ឋានណែនាំឱ្យទៅដាក់ពាក្យបណ្តឹងដើមចាប់ខ្លូនជនសង្ស័យ ។
ចែករំលែកព័តមាននេះ